Дирӯз дар вазъияти тантанавӣ бо баргузор намудани чорабинии пуршукуҳи идона дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд маросими гусели наздик 200 нафар хатмкунандагони ин муассисаи олӣ баргузор гардид.

Дар чорабинӣ Сӯҳроб Рустамзода, намояндаи Мақомоти иҷроияи ҳокимияти давлатии вилояти Суғд, Хурсанд Содиқзода, директори ДПДТТ ба номи академик Муҳаммад Осимӣ дар шаҳри Хуҷанд, намояндагони комиссарияти ҳарбии шаҳру вилоят, волидайни донишҷӯён иштирок ва суханронӣ намуданд.

Таъкид карда шуд, ки ҷавонони даврони соҳибистиқлол насли хушбахти давронанд, зеро барои тақвияти дониш, такмили маҳорат, ҷасурию мардонагии онҳо имрӯз аз ҷониби Давлату Ҳукумат, бахусус Пешвои муаззами миллат муҳтарам Эмомалӣ Раҳмон ҳамаи шароитҳо муҳайё гардидааст. Донишҷӯёни замони Истиқлол бояд бо истифода аз имкониятҳои мавҷуда барои омӯхтани илму дониш саъй варзанд, эҳтироми падару модар ва устодонро ба ҷо оранд ва ҳимояи марзу буми кишварро аз мақсадҳои ниҳоии худ донанд. Зеро хизмат дар сафи Артиши миллӣ мактаби мардонагӣ ва омӯзиш барои ҳар як ҷавонмард маҳсуб меёбад

Иттилоъ дода шуд, ки санаи 28-уми феврали соли 2026 фармони Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар бораи “Ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1999-2008 Ҷумҳурии Тоҷикистон ба хизмати ҳарбӣ” содир шуд. Мутобиқи ин фармон ҷавонони синни даъватӣ вазифадоранд, ки ӯҳдадории худ, яъне қарзи фарзандию виҷдонии худро дар назди халқу Ватан иҷро намоянд. Боиси хушнудист, ки тибқи анъана донишҷӯёни донишкада аз ҳисоби хатмкунандаҳо бо амри дил ва хоҳиши худ барои хизмат дар сафи Қувваҳои мусаллаҳи Ҷумҳурии Тоҷикистон омодагии хешро изҳор медоранд. Имрӯз низ як гурӯҳ аз донишҷӯён пас аз супоридани имтиҳонҳои давлатӣ ба Артиши миллӣ сафарбар мешаванд.

Воқеан ҳам вақте сухан дар бораи ҳимояи марзи Ватан меравад, пеши назар симои ҷавонони бо нангу номус, далеру шуҷо меояд. Тавре Пешвои муаззами миллат муҳтарам Эмомалӣ Раҳмон таъкид мекунанд: «Адои хизмат дар сафҳои Артиши миллӣ на танҳо қарзи муқаддаси фарзандӣ, балки мояи ифтихор ва шарафи бузург буда, хизмати ҳарбӣ ба ҳар як ҷавонмард ҳамчун мактаби ҷасорату матонат, дӯстиву рафоқат ва худогоҳиву меҳанпарастӣ хизмат мекунад».

Изҳори умедворӣ карда шуд, ки ҷавонони бонангу номуси донишкада чун дар хониш бо дониши мукаммал, рафтори намунавӣ дар сафи Қувваҳои Мусаллаҳ низ масъулиятнокӣ, далерии худро нишон дода, қарзи фарзандии хешро дар назди Ватан сарбаландона иҷро хоҳанд намуд.

Сипас барномаи фарҳангии ватандӯстона табъи ҳозиринро болида намуда буд.

Дар ин рӯз бо иқдоми роҳбарияти донишкада ба хатмкунандагони дастархони идона густурда шуд.

Шуъбаи иттилоот ва кор бо ВАО